ចិនគ្រោងវិនិយោគម៉ាស៊ីនប្រតិកម្ម នុយក្លេអ៊ែរនៅរូម៉ានី

ក្រុមហ៊ុនសហ ប្រតិបត្តិការថាមពល នុយក្លេអ៊ែរទូទៅរបស់ចិន ចង់ធ្វើការវិនិយោគ ម៉ាស៊ី​ន​ប្រតិកម្ម​នុយក្លេអ៊ែរថ្មីចំនួន២នៅប្រទេសរូម៉ានី ដោយនឹងត្រូវសហការជាមួយក្រុមហ៊ុនកាណាដា SNC-Lavalin​។ នេះបើតាមការប្រកាសរបស់លោក Constantin Nita រដ្ឋមន្ត្រីក្រសួងថាមពលរូម៉ានី ថ្ងៃ​ពុធ​​កន្លងទៅ ដោយធ្វើឡើងក្នុងឱកាសដំណើរទស្សនកិច្ចរបស់នាយករដ្ឋមន្ត្រីចិន លី ខឺឈាំង នៅ​ទីក្រុង Bucarest។

ក្រុមហ៊ុនសហប្រតិបត្តិការ ថាមពលនុយក្លេអ៊ែរទូទៅរបស់ចិន CGN បានចុះហត្ថលេខា​ជាមួយក្រុម​ហ៊ុននុយក្លេអ៊ែររូម៉ានី លើលិខិតមួយស្តីពីគោលបំណងជាក់លាក់ ដើម្បីបើកការ​ពិភាក្សាលើការ​វិនិ​យោ​គម៉ាស៊ីនប្រតិកម្មនុយក្លេអ៊ែរពីរ ថ្មីទៀត នៅមជ្ឈមណ្ឌលស៊ែរណាវ៉ូដា Cernavoda ស្ថិតនៅ​ភាគ​អាគ្នេយ៍ប្រទេសរូម៉ានី។

ចាប់ពីឆ្នាំ២០១១មក រូម៉ានីបានស្វែងរកអ្នកវិនិយោគ ម៉ាស៊ីនប្រតិកម្មនុយក្លេអ៊ែរចំនួនពីរ នៅមជ្ឈម​ណ្ឌល​ស៊ែរណាវ៉ូដា Cernavoda ភាគខាងត្បូងប្រទេស ហើយនេះគឺជាមជ្ឈមណ្ឌល​នុយក្លេអ៊ែរជាតិ​តែមួយគត់៕